Thellohet bilanci i katastrofës natyrore në Teksas. Raportohet se ka shkuar në 91 numri i viktimave nga përmbytjet, ndërsa autoritetet vijojnë kërkimet për të zhdukurit. Shtëpia e Bardhë njoftoi se administrata e Presidentit Donald Trump po bashkëpunon ngushtë me autoritetet lokale dhe shtetërore për t’u përballur me krizën. Zëdhënësja për shtyp e Shtëpisë së Bardhë paralajmëroi se rreziku nuk ka kaluar, pasi shirat e rrëmbyeshëm pritet të vazhdojnë në ditët në vijim, duke rritur kërcënimin për sigurinë publike. Sipas autoriteteve, më shumë stuhi priten në rajon, të paktën deri të hënën në mbrëmje. Ndërkohë, Shtëpia e Bardhë njoftoi po ashtu se Presidenti Trump planifikon të vizitojë Teksasin gjatë kësaj jave, me gjasë të premten, për të parë nga afër dëmet dhe për të takuar viktimat dhe ekipet e emergjencës. Katastrofa natyrore nisi në orët e para të së premtes, ndërsa lumi Guadalupe u rrit me më shumë se 8 metra në më pak se një orë, duke shkaktuar dëme të mëdha, ndërsa janë ngritur pikëpyetje nëse janë dhënë paralajmërime të mjaftueshme për përmbytje. Ekipet e shpëtimit po kërkojnë me helikopterë, varka dhe makina përgjatë lumit për të gjetur të mbijetuar apo viktima të tjera. Sipas banorëve, kjo është përmbytja më e rëndë në dekada.