Ky ishte stacioni im i 85-të. Unë nuk di në arrij dot ndonjë stacion tjetër, po në iksha nga kjo botë, koka do të mbetet pas dhe në zemër do të kem pishmanllëkun e madh dhe dëshirën e madhe të shoh në këtë Shqipërinë time të dashur demokracinë e vërtetë. I rrethuar mes familjarëve e miqve, Aktori i Madh Reshat Arbana dha një mesazh të fortë, si një testament jete… Lum ai që jeton gojeëmbël dhe zemërbardhë, thotë artisti mes emocionesh… -Ta duam më shumë njëri-tjetrin, të mos luftojmë njëri-tjetrin, të mos kacafytemi, mos të vritemi, mos të shahemi, se kjo Shqipëri e bukur po na lihet e bukur, por kam frikë se një ditë… uroj nuk ndodh gjë. Me talentin e rrallë, përkushtimin dhe energjinë shpërthyese në skenë, Arbana ka sjellë rreth 40 role në kinematografi e qindra të tjera në teatër, ndërsa thotë me binde se filma si Nëntori i Dytë nuk mund të ribëhen. Ne kemi si Kinostudio rreth 300 filma, 200 filma unë po i lë. 100 filma nuk i jap kurrë, sepse janë filma që nuk i bëjmë dot sot. Nuk e bëjmë dot as Çerçiz Topullin, as Nëntorin e Dytë, nuk kemi mundësi se për Ismail Qemalin nuk mund të gjejmë Sandër Pros më, është shumë e vështirë. Dashuria për artin nuk shuhet kurrë dhe për Reshat Arbanën, edhe pas 85 vitesh jetë e gjysmë shekulli karrierë, ka ende ëndrra në sirtar… Kam bërë role që nuk i kisha imagjinuar, i kam hyrë me frikë të madhe, por në fund dolën mirë. Sigurisht, falë punës së madhe, përkushtimit… Ali Pashën do të kisha qejf ta bëja, jam edhe në moshë që i ngjasoj Ali Pashë Tepelenës. Figurë kontraveste është, por duhet në fakt. Me zërin e tij unik e tejet imponues, Nderi i Kombit i dha zë shumë vargjeve portike, përfshirë veprën e Gjergj Fishtës, për të cilën shprehet se ia le trashëgimi brezave të rinj.