Një shqiptar ka rrahur brutalisht një angleze pas një debati në Britaninë e Madhe. Gruaja u godit me grusht dhe u tentua të mbytej nga Emiljano Cakraj më 23 janar të këtij viti në Forest Town. 33-vjeçari gjithashtu e kërcënoi me vdekje gruan. Ajo iu lut Cakrajt që ta çonte në spital, duke i thënë se do të thoshte se kishte rënë nga shkallët, sipas policisë. Pasi e bëri të betohet se nuk do t’i tregonte askujt se çfarë kishte ndodhur, ai tha se do ta merrte. Ata hipën në makinë, por ai kaloi pranë spitalit dhe nuk u ndal. Në atë moment gruaja, e cila ishte në sediljen e pasme, supozoi se Cakraj do ta çonte diku për ta vrarë. Ajo u shtir si e vdekur. Cakraj u fut në një parking dhe thirri dikë që e mori dhe e çoi në spital. Pas hetimeve, policia arrestoi 33 vjecarin gjatë orëve të para të 24 janarit dhe më pas ai u akuzua për sulm. Cakraj u deklarua fajtor për akuzën dhe për ndjekjen e saj mes periudhës 16 mars- 17 maj. Gjykata dëgjoi se shqiptari e ka kërcënuar përmes llogarive të rreme në rrjetet sociale dhe telefonatave anonime. Një nga mesazhet kërcënuese që ai i dërgoi shfaqte një foto të paqartë të makinës së saj. Gjykata tha se Cakraj më vonë u përpoq të fshinte mesazhet që kishte dërguar nga telefoni i tij. 33 vjecari u dënua me tre vjet burg.