“Të largojmë urrejtjen dhe të inkurajojmë ata që shërbejnë” Ky ishte mesazhi që përcolli kryebashkiaku Erion Veliaj, sot në ditën e shenjtërimit të Nënë Terezës, teksa sherbente drekën në qendrën komunitare “Gonxhe Bojaxhi”. “Një qytet vlerëson shërbëtorët, nuk ka rëndësi nëse është zjarrfikësi, nëse është mjeku, nëse është mësuesi, apo psikologu, është një qytet që ka të ardhme. Ne duam të ndërtojmë mbi mësimet e Nënë Terezës të ardhmen e qytetit tonë, duke shërbyer si ajo, duke pasur një zemër të butë dhe të hapur si ajo, duke larguar urrejtjen, mllefin, cinizmin, shpotinë, batutat e pahijshme, banalitetin dhe duke inkurajuar të gjithë ata që shërbejnë, pavarësisht nëse janë në drejtim të qytetit apo të vendit apo të një pozicioni të rëndësishëm, apo nëse po shërbejnë një pjatë supë në qendrat tona. Kush shërben dhe është thirrur të shërbejë, e bën këtë me dashuri është vërtet një bir edhe një bijë e Nënë Terezës” Teksa na ndajnë pak ditë nga nisja e vitit të ri shkollor, një falenderim kryebashkiaku e pati për mësuesit, edukatoret dhe psikologët, por dhe për efektivët që qëndrojnë në krye të detyrës çdo ditë të vitit.