Julia Vavilova, 24 vjeç, është e dashura e Pavel Durov, themeluesit të Telegram që u arrestua të shtunën në një aeroport në Paris. Vajza ishte bashkë me manjatin rus në momenitn e arrestimit dhe fillimisht u aludua se bëhej fjalë për asistenten e tij. Por në fakt Julia Vavilova është e dashura e tij prej disa vitesh dhe është stratege e kriptovalutave. Ajo flet mirë katër gjuhë, anglisht, rusisht, spanjisht dhe arabisht, teksa gjithashtu është e njohur në rrjetet sociale si një eksperte e videolojërave. Ndaj 24-vjecares nuk rëndon asnjë akuzë për lidhje me rrjetin telegram. Ajo është lënë e lirë vetëm pak minuta pas ndalimit në aeroport, ndërkohë që Pavel Durov u arrestua. Sipas mediave franceze, Durov u vendos në paraburgim në bazë të një mandati nga drejtësia franceze, e cila beson se mungesa e moderimit, bashkëpunimi me organet e zbatimit të ligjit dhe mjetet e ofruara nga kompania e mesazheve të koduara Telegram, e bën atë bashkëpunëtor në trafik droge, krime ndaj të miturve dhe mashtrim.