Aktivitetet kulturore dhe artistike në qytetin e Elbasanit të mbajtura gjatë gjithë verës kanë krijuar një atmosferë festive dhe shlodhëse. Këtë fundjavë pranë mureve shekullore të Kalasë, Orkestra e Harqeve Elbasan, në bashkëpunim me mjeshtrin e madh të skenës shqiptare, tenorin Kastriot Tusha dhe sopranon e njohur Erinda Agolli, sollën për publikun elbasanas koncertin vokal–instrumental “Stina Koncertore”. Për dirigjentin Blerim Narazani aktivitete të tilla janë të domosdoshme, jo vetëm për atmosferën që krijojnë tek publiku, por në qytetet me shkolla muzike si Elbasani, shërbejnë për promovimin e artistëve të rinj. Koncerti ‘Stina Koncertore’ solli muzikë të zgjedhur klasike, muzikën e vërtetë që prek shpirtin duke treguar edhe një herë se Elbasani di të flasë bukur me gjuhën e artit.