Nëse zgjedhjet parlamentare do të mbaheshin sot, Partia Socialiste e Edi Ramës do të fitonte me 49.4% të votave në rang kombëtar, kundrejt koalicionit opozitar “Aleanca për Shqipërinë Madhështore” të Sali Berishës, e cila do të siguronte 34.9% të votave. Është ky rezultati i sondazhit të tretë, të publikuar ekskluzivisht në emisionin Top Story, në Top Channel, realizuar në bashkëpunim me kompaninë e njohur amerikane “McLaughlin and Asociates”. Sipas të dhënave të sondazhit të tretë, realizuar nga 26 prilli deri më 3 maj dhe ku janë pyetur 1200 qytetarë, garën mes partive të reja e kryeson partia “Mundësia” e Agron Shehajt, me 5.3% të votave, e ndjekur nga “Nisma Shqipëria Bëhet” e Adriatik Lapajt, me 3.3% dhe Partia Socialdemokrate e Tom Doshit, me 3.1% të votave.