Një rrjedhje e informacionit të sigurisë po shkakton zemërim në SHBA pasi The Atlantic zbuloi se zyrtarë të lartë të administratës Trump transmetuan aksidentalisht plane shumë të ndjeshme ushtarake përmes një grupi bisede në Signal, me një gazetar që po lexonte gjithçka në kohë reale. Në Senat, të hënën, lideri i pakicës, Chuck Schumer, e quajti këtë “një nga shkeljet më tronditëse të inteligjencës ushtarake dhe u kërkoi republikanëve të nisnin një hetim të plotë mbi mënyrën se si ndodhi, dëmin e shkaktuar dhe si mund të shmanget në të ardhmen. “Çdo njëri prej zyrtarëve qeveritarë në këtë bisedë grupi tani ka kryer një krim – edhe nëse aksidentalisht,” shkroi senatori, Chris Coons, në X. “Nuk mund t’i besojmë askujt në këtë administratë të rrezikshme për të mbajtur amerikanët të sigurt.” Sipas raportimit të The Atlantic, kryeredaktori Jeffrey Goldberg u ftua aksidentalisht në një bisedë grupi në Signal me më shumë se një duzinë zyrtarësh të lartë të administratës Trump, përfshirë nënkryetarin JD Vance, sekretarin e shtetit Marco Rubio, këshilltarin e sigurisë kombëtare Mike Waltz, sekretarin e mbrojtjes Pete Hegseth dhe të tjerë. Raporti tregon jo vetëm një keqmenaxhim historik të informacionit të sigurisë kombëtare, por edhe një zinxhir komunikimi potencialisht të paligjshëm, ku plane të ndjeshme ushtarake për sulmet ajrore kundër rebelëve Houthi në Jemen u ndanë në mënyrë të papërgjegjshme në një bisedë të koduar me funksione automatike të fshirjes së mesazheve. “Kjo na ka bërë të dukemi të dobët përballë armiqve tanë”, tha kongresmeni nga Kalifornia, Ro Khanna, për The Guardian. “Duhet ta marrim kibernetikën shumë më seriozisht, dhe pres me padurim të udhëheq për këtë çështje”. Si demokrati kryesor në Komitetin e Inteligjencës të Dhomës së Përfaqësuesve, Jim Himes ka mbikëqyrur shumë seanca të klasifikuara, por rrjedhja e planeve të luftës përmes një bisede në Signal e ka tronditur. “Nëse kjo është e vërtetë, këto veprime janë një shkelje flagrante e ligjeve dhe rregulloreve që ekzistojnë për të mbrojtur sigurinë kombëtare, përfshirë jetën e amerikanëve që shërbejnë në zona të rrezikshme”. tha ai. “Këta individë e dinë rrezikun katastrofik të transmetimit të informacionit të klasifikuar përmes sistemeve të paklasifikuara. Po të kishte bërë diçka të tillë një zyrtar më i ulët në gradë, do të humbiste menjëherë certifikatën e sigurisë dhe do të ishte subjekt i një hetimi penal”.