Në dosjen hetimore, që zbuloi korrupsionin në shërbimin onkologjik në QSUT, janë zbardhur biseda mes mjekëve dhe pacientëve. Në një prej tyre, kryeinfermieri Afrim Ruçi bisedon me bashkëshortin e një prej pacienteve që kërkon të marrë shërbim më para datës së pritjes. “Mos më gjen ndonjë mundësi si t’ia bëjmë sot se unë e kam javore atë kimion, për nder se jam në hall. Ia kemi blerë sa qimet e kokës”, shkruan qytetari në 1 dhjetor të vitit të kaluar, teksa shprehet se nuk mund të presë datën 5. “Të them për pak se jam te Pediatria me çunin”, ia kthen mjeku. Gjykata e Tiranës dha sot masat e sigurimit ndaj 7 personave, ndër ta mjekë në Spitalin Onkologjik të QSUT-së, kirurgë, ish-zëvendës drejtoresha e Përgjithshme e spitalit dhe farmacistë e punonjës. Masat u dhanë pas një hetimi të Prokurorisë së Tiranës për medikamentet në Spitalin Onkologjik të cilat dyshohet se shiteshin tek spitalet private, ku madje u përdorën blerje të stimuluara ilaçesh, prej nga ku është zbuluar se si mjekët i dërgonin pacientët në spitale.