Autoritetet greke kanë zbuluar identitetin e shqiptarit, trupi i të cilit u gjet i ekzekutuar me armë zjarri dhe më pas i djegur në pjesën e pasme të një automjeti në një fshat afër Athinës. Sipas burimeve policore, bëhet fjalë për 27-vjeçarin Sulo Halili nga Tepelena, i cili rezulton i zhdukur që prej pasdites së 4 nëntorit. Halili jetonte në Halkida, prej nga kishte dalë pa lënë gjurmë, ndërsa automjeti i tij u gjet më vonë i braktisur në Vilia të Athinës. Ekspertiza mjeko-ligjore e trupit të gjetur të premten ka zbuluar se viktima është qëlluar një herë me armë zjarri përpara se të digjej. Trupi është gjetur i lidhur me pranga në sediljen e pasme të një automjeti që rezulton i vjedhur. Autoritetet greke po hetojnë disa pista, mes të cilave përfshirjen e mundshme të viktimës në veprimtari kriminale, por nuk përjashtohet as mundësia që ai të jetë gjendur rastësisht në një situatë të rrezikshme.