28-29 Nëntor janë padyshim festat më të dashura për të gjithë shqiptarët, brenda dhe jashtë vendit. Shqiptarët e Greqisë kanë dhënë spektakël një natë më parë në qytetet e këtij shteti, teksa kanë festuar me flamuj, këngë e valle tradicionale nëpër rrugët kryesore. Mediat greke kanë shkruar për këto festime, ndërsa janë ndalur në Selanik, aty ku ‘shqipet’ kanë vërshuar me makinat e tyre në rrugët kryesore dhe para ‘Kullës së Bardhë’, një pikë referimi e këtij qyteti, ndërsa në makina kanë vendosur flamuj të Shqipërisë dhe të UÇK. “Ata kanë parkuar makinat para Kullës së Bardhë dhe kanë festuar duke kërcyer me flamuj”, shkruajnë mediat greke, ndërsa theksojnë se kjo festë është me rëndësi për të gjithë shqiptarët. “Me valle tradicionale, muzikë nga radiot e makinave dhe flamuj të UÇK-së, shqiptarët në Selanik festuan pavarësinë e kombit të tyre të premten në mbrëmje (28/11). Kjo është dita, e njohur edhe si Dita e Flamurit, e cila përkujton pavarësinë e vendit fqinj nga Perandoria Osmane. Pavarësia e Shqipërisë u shpall në Vlorë më 28 nëntor 1912. Vihet re se disa nga pjesëmarrësit në festën nacionaliste kishin vendosur flamuj të UÇK-së (Ushtrisë Çlirimtare të Kosovës) në makinat e tyre. Pjesëmarrësit parkuan makinat e tyre përpara Kullës së Bardhë dhe kërcyen me flamuj”, shkruajnë mediat greke.