Shqipëria mbështet aksionin e Shteteve të Bashkuara të Amerikës në Venezuelë dhe arrestimin e presidentit Nicolas Maduro dhe bashkëshortes së tij, Cilia Flores, të cilët do të gjykohen në New York për trafik droge, terrorizëm dhe trafik armësh. Ministrja për Europën dhe Punët e Jashtme, Elisa Spiropali, deklaroi mbështetjen e vendit tonë krah Shteteve të Bashkuara dhe Presidentit Trump në veprimet e tyre kundër regjimit të Venezuelës. "Ne mbështesim lidershipin e fortë të Sekretarit të Shtetit Rubio në përballjen me autoritarizmin, korrupsionin dhe rrjetet kriminale transnacionale. Si një aleat i palëkundur i SHBA-së dhe anëtar i NATO-s, Shqipëria qëndron krah për krah me lidershipin amerikan në mbrojtje të parimeve demokratike dhe sigurisë globale”. Shefja e diplomacisë shqiptare thekson se populli venezuelian ka të drejtë për liri, demokraci dhe sundim të ligjit, ndaj dhe sipas saj, bashkësia ndërkombëtare nuk duhet të heshtë përballë shtypjes dhe frikës.