Si çdo organ tjetër, truri ka nevojë të çlodhet. Pavarësisht buxhetit që ka individi apo familja, njerëzit duhet të shkëputen patjetër nga rutina qoftë edhe për pak ditë, këshillojnë ekspertët e shëndetit mendor. “Dy javë pushim do të ishin të domosdoshme në periudhën e verës. Dikush do të shkojë në mal, dikush në det dhe gjatë periudhës së pushimeve është shumë i rëndësishëm ushqimi, aktiviteti fizik, duke programuar shëtitje me miq dhe të afërm, të cilët të bëjnë të ndihesh mirë. Një tru i mbilodhur mund të përjetojë një gjendje ankthi të shprehur, çrregullime të gjumit, nervozizëm, hiperaktivitet, humor të rënë, e mund të shkojë deri në depresion. Ka pasur raste që pagjumësia të ketë shkaktuar edhe psikoza madhore, personat dëgjojnë zëra, kanë ndjesinë se dikush po i ndjek nga mbrapa, se dikush do t’u bëjë keq. Truri ka nevojë për qetësi, dhe nëse ai është gjatë gjithë kohës në aktivitet dhe i ngarkuar, do të bëhet shkak për probleme të shëndetit mendor, por edhe fizik.