Në Theth është shembur ndërtesa e fundit e parashikuar në kuadër të operacionit kundër ndërtimeve pa leje në parkun kombëtar. Aksioni, i udhëhequr nga Inspektorati Kombëtar i Mbrojtjes së Territorit vijoi edhe gjatë mbrëmjes së të hënës, ku nuk mungoi tensioni mes autoriteteve dhe banorëve vendas. Ndërhyrja e IKMT-së hasi në rezistencë nga ana e banorëve, të cilët kërkuan pezullimin e veprimeve deri në dhënien e një vendimi përfundimtar nga gjykata. Sipas tyre, çështja është ende në proces shqyrtimi dhe vendimi pritet brenda 5 ditësh. Gjatë operacionit, forcat e policisë siguruan perimetrin e objektit, ndërsa familjarët hynë brenda godinës, duke penguar për disa orë vijimin e shembjes. Pas ndërhyrjes së policisë, banorët u nxorën jashtë dhe fadromat vijuan punën deri në prishjen e plotë të ndërtesës. Kjo është ndërhyrja e fundit në një seri shembjesh që kanë nisur një javë më parë, ku rreth 100 ndërtime pa leje janë shkatërruar brenda kufijve të parkut kombëtar të Thethit. Aksioni është mbështetur nga forca të shumta policore për të garantuar mbarëvajtjen e operacionit dhe shmangien e përplasjeve. Autoritetet kanë bërë me dije se pas ndërhyrjes së fundit, do të vijojnë për disa ditë me pastrimin e mbetjeve të ndërtimeve, përpara se të tërhiqen nga territori i mbrojtur.