Kanadaja do të përgjigjet menjëherë me një sërë kundërmasash të fuqishme nëse presidenti amerikan Donald Trump do të vendosë tarifa për produktet kanadeze, ka thënë kryeministri Justin Trudeau. Të enjten, Trump përsëriti kërcënimin për të vendosur tarifa mbi importet nga Kanadaja, Meksika dhe Kina që do të fillonin nga 25 për qind dhe sipas tij “mund të rriten me kalimin e kohës”. Tarifat, sipas Trumpit, do të vendosen si përgjigje ndaj fluksit të emigrantëve dhe prodhimit të narkotikëve në këto vende. “Nëse presidenti zgjedh të zbatojë ndonjë tarifë kundër Kanadasë, ne jemi gati me një përgjigje. Do të jetë një përgjigje e menjëhershme, e fuqishme, por e arsyeshme. Nuk është ajo që ne duam, por nëse ai vendos, jemi të detyruar që gjithashtu të veprojmë për të mbrojtur interesat e qytetarëve tanë”, ka thënë Trudeau.