Për të dytën ditë radhazi, raportet e tensionuara mes Kosovës dhe Serbisë kanë qenë lart në axhendën e diskutimeve të liderëve të Bashkimit Europian, të mbledhur në Bruksel. Edhe në ditën e parë të samitit, gjendja në veri të Kosovës ishte temë debati e u diskutua së pari në një takim të përbashkët që liderët e BE-së patën me sekretarin e Përgjithshëm të NATO-s, Jens Stoltenberg, e pastaj edhe në takimin e shefave të shteteve apo qeverive të BE-së. “Ishte një diskutim mjaft dinamik dhe shumë pjesëmarrës folën rreth kësaj cështjeje. Por, porosia kryesore ishte se duhet të veprohet shpejt për shtensionimin e situatës dhe këto veprime duhet të ndërmerren nga nga të dyja palët“, pohoi një zyrtar i bllokut. Gjatë ditës pritet të debatohet edhe mbi tekstin e konkluzioneve, ku mes të tjerash një paragraf i kushtohet Kosovës dhe Serbisë, dhe një tjetër, zgjerimit të Bashkimit Europian. Problemi me konkluzionet është se ato të gjitha janë në një dokument dhe ka mundësi që për shkak të mospajtimeve mes vendeve të BE-së për temën e emigracionit, të mos miratohen fare as konkluzionet për temat tjera.Në tekstin e konkluzioneve kushtuar zgjerimit të BE-së, pritet që të shprehet mbështetja për integrimin e vendeve të rajonit të Ballkanit Perëndimor në BE.