Polonia njoftoi se hapësira ajrore e këtij shteti të NATO-s është shkelur. Sipas autoriteteve ushtarake dyshohet për një dron rus që ka depërtuar në territor menjëherë pas sulmeve vdekjeprurëse ajrore të kryera nga Rusia ndaj Ukrainës. Më shumë se 100 raketa dhe rreth 100 dronë u lëshuan nga Rusia kundër Ukrainës në rajonet perëndimore të saj, duke vrarë të paktën katër persona dhe duke shënjestruar sistemin e energjisë. Gjatë sulmeve, hapësira ajrore e Polonisë u shkel nga një objekt që hyri nga Ukraina, tha gjenerali i ushtrisë polake. “Ndoshta po përballemi me hyrjen e një objekti në territorin polak. Ky objekt është konfirmuar nga të paktën tri stacione për gjurmim përmes radiovalëve”, deklaroi gjenerali polak, Macej Kliz. Ushtria polake vazhdon kërkimet për të identifikuar objektin rreth 30 kilometra larg nga kufiri ukrainas. Në mars, Polonia kishte raportuar për shkelje të hapësirës së saj ajrore nga një raketë ruse dhe kishte kërkuar shpjegim nga Moska për këtë rast. Një incident i ngjashëm kishte ndodhur edhe më 29 dhjetor 2023, kur një raketë ruse hyri në hapësirën ajrore polake për disa minuta, para se të kthehej në Ukrainë.