Nëse në qendër të Tiranës dominonte molotovi, diku në rrugët hyrëse të kryeqytetit, erdhi në jetë një fëmijë. Por lindi në makinë, sepse nëna e tij nuk arriti dot në kohë në spital. Ngjarja e rrallë ndodhi pikërisht në mbrëmjen e së hënës në Tiranë, ku një qytetare lindi fëmijën në automjet për shkak të vonesës. Mësohet se makina e cila po e transportonte u bllokua në trafik, pasi shumë rrugë të kryeqytetit ishin të bllokuara prej protestës së opozitës. Ngjarja ka kapur disi të papërgatitur edhe punonjësit e spitalit, të cilët janë vonuar për disa çaste duke irrituar disa prej personave që ndodheshin aty. Nga informacionet pranë spitalit gruaja është në gjendje të mirë shëndetësore bashkë me beben. Ka lindur vajzë dhe është fëmija i dytë i saj. Pas ndihmës së dhënë në spitalin e Traumës ku ajo u paraqit pasi ndodhej më afër, është përcjellë menjëherë në maternitetin Mbretëresha Geraldinë.