Një hetim gati 4 vjeçar i ndihmuar dhe nga dekriptimet e mesazheve të dërguara në rrjetin Sky Ecc është goditur një rrjet i fuqishëm ndërkombëtar i trafikut të drogës. Hetimi i nisur nga autoritetet italiane çoi në lëshimin e 61 urdhër-arresteve për persona të dyshuar për trafik kokaine dhe pastrim parash në katër vende: Itali, Shqipëri, Zvicër dhe Poloni. Sipas Spak në Shqipëri, janë kryer 21 kontrolle banesash dhe ambiente të tjera. Janë arrestuar në flagrancë dy pjesëtarë të grupit kriminal, konkretisht Jurgen Kaçurri dhe Arjanit Maloku. Gjithashtu janë sekuestruar në cilësinë e provës materiale 30 mijë Euro, 6 mijë Paud, 2 automjete, 1 armë, 4 ora të markës Rolex, 26 aparate celulare, dokumente, sende të tjera me vlerë, si dhe prova të tjera materiale. Sipas mediave italiane, grupi kishte rrënjë në Shqipëri dhe trafikonte kokainën nga Amerika e Jugut drejt Evropës, duke përdorur rrugë të fshehta tregtare. Droga më pas transportohej me kamionë dhe kalonte përmes Spanjës dhe Holandës për të mbërritur në Itali. Ndërkohë, një skemë e sofistikuar pastrimi parash përfshinte një shoqatë italo-kineze, e cila transferonte shuma të mëdha kapitali të paligjshëm jashtë vendit përmes faturave të falsifikuara. Përfitimi nëpërmjet kësaj skeme dyshohet se ishte rreth 375 milionë euro. Autoritetet kanë mundur të sekuestrojnë vetëm 60 milionë euro dhe në pranga kanë rënë 21 anëtarë të këtij grupi kriminal. Po ashtu, autoritetet kanë kapur 360 kilogramë kokainë me një vlerë tregu rreth 30 milionë euro, 2.5 milionë euro cash, 5 pistoleta dhe disa automjete. Operacioni është realizuar në bashkëpunim me Europolin, Eurojustin dhe forcat policore nga disa vende, duke përfshirë Shqipërinë, Poloninë dhe Zvicrën. E veçanta e këtij Rrjeti kriminal, ishte se vepronte në fshehtësi të thellë, kishte krijuar një metodë të avancuar për të shmangur kontrollin policor dhe doganor, duke minimizuar rreziqet e kapjes dhe duke kursyer komisione të mëdha në transferimin e të ardhurave nga krimi.