Ushtria izraelite njoftoi se arriti të godiste të dielën një raketë të lëshuar nga Jemeni, disa orë pasi avionët izraelitë patën goditur disa objektiva të grupit huthi në këtë vend të Gadishullit Arabik. Sulmet ajrore izraelite, të bëra në kundërpërgjigje ndaj një sulmi vdekjeprurës me dron të huthive në Tel Aviv, ishin hera e parë që Izraeli i përgjigjet sulmeve të këtij grupi përgjatë nëntë muajve të luftës ndaj Hamasit. Shpërthimi i dhunës mes dy armiqve në distanca të mëdha gjeografike, rrezikon të çelë një front të ri, ndërsa Izraeli po përballet në rajon me disa organizata të mbështetura nga Irani. Ushtria izraelite konfirmoi në orët e vona të së shtunës sulmet ajrore në qytetin port në perëndim të Jemenit, Hodeidah, një bastion i huthive dhe një pikë kyçe për kalimin e ndihmave dhe furnizimeve të tjera. Ushtria izralite tha se në sulmet e kryera nga dhjetëra avionë, u përfshinë avionë luftarakë F-15 dhe F-35 të prodhimit amerikan dhe se ishin një kundërpërgjigje ndaj qindra sulmeve të huthive. Sipas Ministrisë së Shëndetësisë në Jemen, sulmet izraelite vranë gjashtë persona dhe plagosën 83 të tjerë. Zëdhënësi i grupit huthi Mohammed Abdulsalam shkruajti në rrjetin X se "agresioni i hapur izraelit" kishte në shënjestër objektet e magazinimit të karburantit dhe centralin energjetik. Izraeli, së bashku me aleatët perëndimorë që kanë forca ushtarake në rajon, kanë interceptuar pothuajse të gjitha raketat dhe dronët e nisur nga grupi huthi. Por në orët e para të së premtes, një dron i grupit huthi depërtoi mbrojtjen ajrore të Izraelit dhe u rrëzua në Tel Aviv, kryeqyteti tregtar dhe kulturor i Izraelit, duke vrarë një person. Ushtria izraelite tha se sulmi ajror i së shtunës në Hodeibah, rreth 1700 kilometra larg Izraelit, ishte ndër operacionet më të komplikuara dhe në distancën më të largët. Ushtria izraelite u kundërpërgjigj, duke sulmuar portin për shkak se kjo zonë përdoret për furnizimin me armatimet iraniane. Pamjet: AFP