Me urdhër të spakut, Forcat RENEA mësynë në Shkodër në lagjet Dobraç, Kiras, Rus, Dergut dhe në fshatrat Shtoj i ri dhe Shtoj i vjetër. Aksioni u urdhërua nga prokurorja e SPAK, Elida Kackini që po heton masakrën e Dobracit me 4 viktima, dy të pafajshëm dhe shënjestrat Hamza Lici dhe Arlind Bushati, ngjarje kjo ende e pazbardhur. Aksioni nisi mbrëmjen e së mërkurës dhe vazhdoi edhe përgjatë orëve të para të kësaj të enjteje në banesat e personave me precedentë penalë, ato të fiseve Bajri dhe Bilali. Burime të Top Channel bëjnë me dije se kontroll është ushtruar edhe në banesën e Izmir Sakicës, i shpallur në kërkim për masakrën e Dobracit. Raportohet se deri në këtë fazë nuk ka të arrestuar, por janë gjetur materiale të tjera që janë sekuestruar, përfshirë dhe armë që do të ekspertohen nëse janë përdorur në ngjarje kriminale të mëparshme. Raportohet në rrugë operative se janë lëshuar edhe urdhërarreste, por mbeten të rezervuara informacionet mbi dyshimet që ka organi i akuzës për rolin e tyre.