Vera është stina më e mirë për të bërë punë në qytet, kështu është shprehur kreu i bashkisë së Tiranës. Veliaj kësaj here inspektoi punimet që po bëhen në njësinë 11, sipas tij kjo zona që dikur shihej si periferia e Tiranës tashmë do të marë një pamje të re, e cila njëkohësisht do të rrisë dhe vlerën e pronës në zonë. "Premtimi që kemi bërë është se pavarësisht nëse jemi në ish Bllok apo në periferi, do të punojmë me të njëjtin standard. E gjithë zona këtu, zona e Treshit, e Kodër- Kamzës, kanë qenë zona që janë zhvilluar ndër vite, sidomos në vitet ’90, kryesisht me ato mjetet rrethanore, sakrificat e familjeve që kanë kursyer gjithë lekët e emigracionit për t’u transferuar në Tiranë. Këtu do të shtohet vlera e pronës. Një pronë me gropa septike, pa ndriçim, pa kanalizim e pa hyrje për zjarrfikës apo ambulancë është një pronë pa vlerë. Por, një pronë që i ka të gjitha këto, është një pronë që i shumëfishohet vlera", tha Veliaj. Kreu i Bashkisë tha se me investimet që po behen në çdo cep të Tiranës, qyteti do të bëhet edhe më i sigurt për të gjithë ata që përqafuan një mentalitet të ri se si drejtohet qyteti. “Njerëzit këtu kanë kuptuar se deri dje kanë qenë mish për top, kontingjent vetëm për të xhiruar gomat e hedhur molotov e bërë zjarr. Ky komunitet ka kuptuar se nuk bëhet më mish për top për askënd. Na kanë dhënë besimin, pikërisht se besojnë në këtë mentalitet të ri dhe në këtë frymë të re. Shumë mirënjohje komunitetit, faleminderit për durimin dhe me krahë të lehta gjithë grupit!” Kreu i bashkisë, Erion Veliaj tha se punët në Tiranë bëhen një lloj pavarësisht nëse jeton në qendër apo në periferi, të gjitha qytetarër meritojnë rrugë të shtruar dhe të ndriçuara.