Raportuesi për Kosovën në Parlamentin Evropian, Riho Terras, ka reaguar pas mbështetjes që presidenti serb Aleksandar Vuçiç mori nga lideri rus Vladimir Putin. Në një bisedë të fundit mes dy liderëve, Putin e garantoi mbështetje për autoritetet serbe, ndërkohë që këto të fundit po përballen me protesta antiqeveritare në vend. Terras ka theksuar se ndërhyrjet e Rusisë në Ballkan nuk janë diçka e re, duke kritikuar ashpër presidentin Vučić për orientimin e politikave të Serbisë drejt një të ardhmeje nën ndikimin e Moskës. Ai ka shprehur shqetësimin se Vučić po i shikon zhvillimet e ardhshme të Serbisë përmes prizmit të “diktatit të Putinit”. “Modelet e ndërhyrjeve të Rusisë nuk janë asgjë e re dhe Presidenti Vučić nuk lë asnjë dyshim – ai e sheh të ardhmen e Serbisë nën diktatin e Putinit”, ka thënë Terras, duke i bërë thirrje autoriteteve evropiane që të veprojnë për të ruajtur integritetin dhe pavarësinë e rajonit. Bashkimi Evropian ka reaguar gjithashtu pas veprimeve të fundit të Serbisë në Këshillin e Evropës, duke i konsideruar ato si shkelje të qarta të Marrëveshjes së Ohrit. Serbia ka penguar ftesën e Kosovës për të marrë statusin e kandidatit special në Komitetin Politik të Asamblesë së Këshillit të Evropës, një veprim që sipas BE-së, shkel marrëveshjen e normalizimit të raporteve mes dy shteteve, ka thënë një zëdhënës i BE.