Ndërsa na ndan vetëm një ditë nga kalimi në Parlament për miratim i buxhetit të vitit 2024, kryeministri Rama ka vijuar të ndajë risitë e tij veçanërisht në Arsim. Kryeministri bëri të qartë përmes një postimi në rjret se buxheti i vitit 2024 garanton përfundimin e 30 shkollave, si dhe hapjen e kantiereve të reja. Projekt-buxheti i vitit 2024 për Ministrinë e Arsimit dhe Sportit parashikohet në vlerën e 52 miliard e 223 milion lekë, me një shtesë fondi prej 5 miliard e 49 milion lekë ndaj buxhetit fillestar të vitit 2023, ose një rritje prej 10.7%. Duke përfshirë edhe fondin e rritjes së pagave për mësuesit për vitin 2024, i cili parashikohet në shumën 4 miliard lekë, buxheti i MAS për 2024 projektohet në shumën 56 miliardë e 223 milion lekë ose 9 miliard e 49 milion lekë më shumë se buxheti fillestar i vitit 2023. Falë këtij projektimi “Ministria e Arsimit dhe Sporteve do të vijojë zhvillimin e reformave në arsim, orientimin e kurikulave ndaj nevojave të tregut të punës dhe modernizimin e tyre, zhvillimin profesional të mësuesve, si dhe përmirësimin e infrastrukturës shkollore, shkolla dhe konvikte të reja sipas standardeve të miratuara”, krahas rritjes historike të pagave për mësuesit, edukatorët dhe punonjësit e tjerë në shkolla. Paga mesatare për mësuesit do të shkojë në 90 mijë lekë të reja.