Situata politike e javëve të fundit në Shqipëri po ndiqet nga mediat ndërkombëtare, ndërsa kryeministri Edi Rama dhe lideri i opozitës, Sali Berisha, si rrallëherë kanë pranuar të flasin njëkohësisht për të njëjtin artikull të një media të huaj si “Politico.eu”, duke e zhvendosur aty debatin. Duke iu referuar protestës së fundit “Politico” shkruan se “Mijëra qytetarë dolën në rrugët e Tiranës, duke kërkuar dorëheqjen e Ramës pas akuzave për korrupsion kundër zëvendëses së tij, Belinda Balluku. Protestat e organizuara nga Partia Demokratike u shoqëruan me dhunë: katër persona u arrestuan, shtatë të tjerë u vunë nën hetim, dhe disa u plagosën” Berisha e quajti protestën të drejtë dhe të nevojshme. “Ne nuk e tolerojmë asnjë formë dhune, veçanërisht dhunën e ushtruar nga ata që janë në pushtet. Protestat kishin për qëllim të ndalonin plaçkitjen sistematike të kryer nga Edi Rama dhe ministrat e tij kundër popullit shqiptar.” Nga ana tjetër, kryeministri Rama u përpoq të ishte më i përmbajtur ndaj kundërshtarit politik dhe kritikoi në mënyrë të moderuar Spakun. “Nuk dua t’i kritikoj kundërshtarët e mi politikë, sepse ata janë thjesht bashkëqytetarë të dëshpëruar, për t’u përballur dhe trajtuar brenda jetës sonë politike. Ndërsa Spaku, është normale që të bëjë gabime. Është një institucion i porsalindur, me pushtet të pavarur, që ka bërë shumë gabime.” Berisha iu kundërpërgjigj Ramës duke e akuzuar për vjedhje zgjedhjesh dhe kërkoi largimin e tij menjëherë, duke thënë se “koha e tij ka mbaruar”.