Ndoshta nuk ka një arsye të vetme përse grupet e huliganëve dhe eksponentëve të dhunshëm të ekstremit të djathtë që në emër të mbrojtjes së identitet të Britanisë apo Anglisë, në varësi të vendbanimit, apo pakënaqësisë për dyndjen e emigrantëve ne ishull, pasi shkaktuan dhunë dhe terror apo përplasje të përgjakshme të paprecedentë me forcat policore, prej dy ditësh nuk janë më prezent dhe nuk kane marre pjese ne afro 100 tubimet dhe protestat që paralajmëruan në median sociale. Ekziston një konsensus se mobilizimi masiv i forcave policore dhe të ndërhyrjes së shpejtë të specializuara, dhe mijërat e anti-protestuesve paqësor kundër racizmit dhe pro-emigrantëve në Londër dhe disa qytete të vendit kanë pasur efektin e tyre frenues. Edhe drejtësia e shpejtë dhe ndëshkimet dhe ndjekjet penale me procedurë të përshpejtuar, ka futur frikën në komunitetet nga vijnë dhe jetojnë, kur policia troket sic ka ndodhur në orët e para të mëngjesit dhe ka arrestuar të dyshuarit e përfshirë në dhunë. Madje as maskat nuk i kane shpëtuar protestuesit e dhunshëm nga fshehja e identitetit të tyre, pasi teknologjia ia mundëson Policisë identifikimin e personave që mbajnë maska dhe me tatuazhe. Nuk janë vetëm policia me uniformë që është në veprim, por edhe një ushtri e tërë detektivësh në prapavijë që analizojnë filmimet e kamerave me qark të shkurtër nëpër rrugët dhe sheshet e qyteteve britanike apo edhe kamerat trupore te forcave policore. Publikimi i emrave dhe fotove në median kombëtare dhe lokale të personave të paditur ka ndikimin e vete, kur ne delirin dhe gjakimin për famë, del ne faqet e para te tabloideve kombëtar si “The Sun”, me kryetitullin, “Të kapur ne çark dhe drejt burgut”. Pas trazirave të Londrës në 2011, arrestimet vazhduan edhe pas disa muajsh dhe viteve. Kjo mund të ketë hequr helmin nga qëllimet e ekstremistëve për momentin. Megjithëse anarkistët dhe protestuesit raciste e te dhunshëm nuk janë dukur rrugëve gjatë dy netëve të kaluar, ata mund të kenë bërë që të fusin një lloj frike në radhëtt e komuniteteve zezake dhe aziatike, por edhe publikut te gjere, e cila ka gjasa të zgjasë më shumë pas rikuperimit të dëmeve fizike. Fundjava pritet të jetë e trazuar serish, sa për shkak të kohës së ngrohtë në Britani dhe fillimit të kampionateve te kategorive më te ulëta ne futbollin anglez.