Sekretari për Çështjet e Jashtme, Lord David Cameron, parashikohej që gjatë vizitës në Tiranë, të takohej edhe me presidentin Bajram Begaj dhe kreun e SPAK, Altin Dumani. Por, menjëherë pas deklaratës për shtyp me kryeministrin Edi Rama u largua drejt Londrës. Pikërisht kjo ndërprerje e vizitës sipas mediave britanike ka të bëjë me një zhvillim të rëndësishëm në pritje të ndodhë në Britaninë e Madhe. Kryeministri i Mbretërisë së Bashkuar Rishi Sunak, në mbledhjen e sotme të kabinetit, shpalli zgjedhjet e përgjithshme të parakohshme për 4 korrik, teksa partia e tij Konservatore po përballet me një luftë të vështirë për të zgjatur 14 vitet e saj në pushtet. Sunak i kishte rezistuar prej kohësh thirrjeve për zgjedhje të parakohshme, por rënia e normave të inflacionit, e njoftuar të mërkurën, duket se e detyruan të shpallë vendimin, që mund të çojë në rënien e qeverisë së tij, Lëvizja mirëpritet nga Partia Laburiste e opozitës, e udhëhequr nga Keir Starmer, e cila po rritet në sondazhet e opinionit dhe ka kërkuar të paraqitet si një grup i reformuar dhe i moderuar i gatshëm për pushtet. Megjithatë, Sunak shpreson se një fushatë e sukseshme mund të rezultojë në qëndrimin në pushtet të konservatorëve, të cilët qeverisin që prej viti 2010. Ai është lideri i pestë i konservatorëve që shërben gjatë asaj kohe, kur vendi është përballur me probleme ekonomike, Brexit, pandeminë Covid-19 dhe krizën e kostos së jetesës. Partia e Sunak ka të ngjarë të vendosë përpjekjet për të trajtuar migracionin ilegal në qendër të fushatës së tij, lëvizja e fundit për të dëbuar azilkërkuesit në Ruanda, teksa fluturimet e para mund të nisin gjatë fushatës. Votimi do të zhvillohet të enjten më 4 korrik në të gjitha 650 zonat parlamentare të Mbretërisë së Bashkuar dhe numërimi do të ndodhë brenda natës, me dy partitë kryesore që kërkojnë të kalojnë shifrën e 326 të nevojshme për një shumicë.