Statuja e Egerton Rierson, i njohur ndryshe si arkitekti i Shkollave rezidenciale në Kanada, ku bëhej arsimimi i detyruar dhe asimilimi i fëmijëve indigjenë, është rrëzuar dje gjatë një proteste Toronto. Protestuesit u mblodhën për të kërkuar drejtësi pasi mbetjet e trupave të 215 fëmijëve indigjenë u gjetën pranë ish-shkollës rezidenciale Kamloops, në rajonin British Columbia. Protestuesit u ngjitën në piedestalin e statujës së rrëzuar me flamurë indigjenë në duar, duke brohoritur kundër padrejtësive ndaj popullatës para-koloniale të Kanadasë. "Ishte koha që kjo statujë të binte, ka një dhimbje të madhe për këdo që ka qenë këtu,” tha një nga protesuesit, duke iu referuar institucioneve të menaxhuara nga Kisha Katolike, të përfolura shpesh për abuzime të të gjitha llojeve, ndaj fëmijëve indigjenë. Shkolla rezidenciale indiane Kamloops ishte krijuar në 1890 nga Kisha Katolike Romane, dhe ishte mbyllur në vitin 1978. Ajo ishte pjesë e një rrjeti shkollash të tilla në të gjithë Kanadanë me qëllim asimilimin e detyruar të fëmijëve indigjenë duke i marrë me forcë fëmijët nga familjet e tyre e duke i ndaluar të flisnin gjuhën e komunitetit apo të praktikonin zakonet e veta kulturore. Të paktën 150,000 fëmijë kanë frekuentuar shkolla të tilla në atë që një Komision Rikëshillimi në vitin 2015 përshkruante si “kulturë genocidi” që shënjestronte popujt indigjenë të Kanadasë.