Policisë së Serbisë iu desh të përdorte gazlotsjellës për të shpërndarë turmat e njerëzve që qëndronin rrugëve pas protestës së studentëve në Beograd. Qindra mijëra qytetarë e studentë u mblodhën në shesh të shtunën, në protestën me të cilën vendosën ultimatum për zgjedhje të reja në Serbi dhe rrëzim të presidentit Aleksandar Vuçiç. Studentët parashtruan dy kërkesa për qeverinë serbe: Së pari, kërkohen zgjedhje të parakohshme, kurse e dyta ka të bëjë me largimin e mbështetësve të presidentit serb, Aleksandër Vuçiç, të cilët kanë ngritur kampe në afërsi të universiteteve dhe kundërshtojnë protestat e studentëve. Protestuesit i lanë afat Vuçiçit që kërkesat të përmbusheshin deri në orën 21:00 të së shtunës, por presidenti serb i refuzoi. E fiks në orën 21:00, studentët bënë thirrje se “ultimatumi ka përfunduar”. Aty ndërhyri edhe xhandarmëria serbe dhe dy brigada policie, siç ka raportuar e përditshmja “Danas”. Më pas protestuesit u konfrontuan me policinë. Në disa raste pati edhe hedhje të gazit lotsjellës nga Policia. Për më shumë se shtatë muaj, studentët kanë organizuar protesta në të gjithë Serbinë, duke kërkuar kryesisht që të përcaktohet përgjegjësia politike dhe penale për vdekjen e 16 personave nga shembja e strehës së betonit në Stacionin Hekurudhor në Novi Sad.