Në heshtje, kanë ndezur qirinj duke formuar fjalën "dorëheqje" dhe duke mbajtur tullumbace të zeza dhe pankarta ku shkruhej «Disa nuk arritën kurrë!» Janë mijëra grekë ,shumica të rinj që janë mbledhur para parlamentit në qëndër të Athinës ,por edhe në rrugët e qyteteve të tjera për të shprehur pikëllimin dhe zemërimin e tyre për aksidentin vdekjeprurës të përplasjes së dy trenave në Tempi para 3 ditësh ku humbën jetën të paktën 57 persona, shumica prej tyre studentë. Por heshtja është kthyer në britma proteste nga pjesmarrësit që kërkojnë të jepen përgjegjësitë për tragjedinë të cilën e cilësojnë si një krim. Pasojnë konfrontimet me forcat e policisë të cilat përgjigjen me gaz lotsjellës. E njëjta skenë edhe në Larisa dhe Selanik ku mijëra qytetarë e studentë pasi ndezën në heshtje qirinjtë, marshojnë drejt stacionit të trenit duke hedhur parrulla e më pas konfrontohen me forcat policore. Vala e protestave ka filluar prej mesditës të së premtes me mijëra studentë që mbanin parrulla ku shprehin indinjimin e tyre për jetët humbura në aksidentin hekurudhor ,ndërsa kanë shkruar fjalën "vrasës" në rrugë dhe dritaret e zyrave të operatorit të pasagjerëve Hellenic Train.