Kamionistët vijonin sot të rezistonin në bllokimin e paprecedentë të qendrës së kryeqytetit të Kanadasë, në protestë ndaj vaksinimit të detyruar dhe kufizimeve Covid. Kryeminsitri Justin Trudeau ka folur ashpër kundër protestave në Ottawa, të cilat tashmë kanë frymëzuar lëvizje të ngjashme proteste në Francë, Holande e Zelandën e Re. Policia kanadeze ka paralajmëruar arrestime të kamionistëve dhe protestuesve që kanë bllokuar pika të rëndësishme të transportit me SHBA. Trudeau tha në parlament se karvanet e protestës po pengonin rekuperimin ekonomik të vendit. "Bllokadat, demonstratat ilegale janë të papranueshëm dhe po dëmtojnë bizneset e prodhuesit, duhet të bëjmë gjithçka për t’i dhënë fund”. Ndërsa duke iu drejtuar protestuesve, kryeministri shtoi: "Nuk i jepet fund pandemisë me bllokada ... Kjo bëhet me shkencë, me masa shëndetësore”.