Një ngjarje e tmerrshme e pandodhur kurrë më parë tronditi Pragën mesditën e kësaj të enjteje. Një student hapi zjarr në sheshin e vjetër të qytetit në fakultetin e filozofisë së Universitetit, Charles në Pragë, duke vrarë të paktën 15 persona dhe plagosur 30 të tjerë. Këto janë momentet pak pas sulmit të tmerrshëm që shkaktoi panik jo vetëm në fakultet por edhe në zonën historike të qytetit, mjaft e frekuentuar edhe nga turistët. Atentatori, një student çek, 24 vjeç i identifikuar si David Kozak, është vrarë pas sulmit. Agjentët e policisë ndërhynë masivisht në sheshin e qytetit të vjetër të Pragës, duke evakuuar fakultetin dhe zonën përreth tij. Sipas policisë, i riu ka hapur zjarr nga çatia e universitetit, ndërsa ngjarjen e kishte paralajmëruar ditë më parë në mediat sociale. Ministri i Brendshëm çek Vit Rakusan tha se me neutralizimin e agresorit nuk kishte më rrezik në zonë, ndërsa ju kërkoi njerëzve të bashkëpunonin me autoritetet. Ndërkaq kryeministri Petr Fiala tha se kishte anuluar të gjitha angazhimet e tij, deri në zbardhjen e ngjarjes së rëndë. Referuar publikimeve në media, ditët e fundit në rrjetin Telegram, sulmuesi David Kozak kishte publikuar mesazhe delirante dhe shumë të forta, ku thoshte se dontë të shkaktonte një masakër në shkollë, duke u frymëzuar nga disa të rinj rus që kryen veprime të ngjajshme.