“Jam i pafajshëm, kërkoj të lirohem menjëherë. Nuk mbaj mjete prerëse dhe sherrin nuk e kam nisur unë.” Me këto fjalë iu drejtua gjyqtarit, 56-vjeçari Mikel Ndoj në seancën e zhvilluar të mërkurën në Gjykatën e Durrësit. Dy ditë më parë, ai plagosi me thikë vajzën e tij 24-vjeçare, si edhe një koleg të saj që ndërhyri për ta mbrojtur. Pavarësisht deklarimeve të tij, Gjykata caktoi masën e sigurisë “arrest në burg”, duke e vlerësuar të ligjshëm dhe arrestimin e tij nga policia. Gjatë seancës, prokurorja e çështjes rindërtoi dinamikën e ngjarjes që ndodhi paraditen e së hënës dhe deklaroi se ndaj Ndojt rëndojnë tre vepra penale, dy prej të cilave me rrezikshmëri shumë të lartë, për të cilat parashikohet dënim jo më pak se 20 vite burgim ose burgim i përjetshëm. Ndoj u mbrojt nga një avokate e caktuar kryesisht, ndërsa akuzohet për vrasje për shkak të marrëdhënieve familjare, mbetur në tentativë, vrasje me dashje, mbetur në tentativë dhe mbajtje paleje të armëve të ftohta.