Kryeministrit të Sllovakisë, Robert Fico, i cili u plagos rëndë në një atentat, i është rikthyer vetëdija pasi iu nënshtrua një operacioni disaorësh, njoftuan mediat vendëse të enjten. Zyrtarët e spitalit në qytetin Banska Bistrica të Sllovakisë thanë se lideri populist pro rus, 59 vjeç, iu nënshtrua një operacioni pesorësh, i cili u krye nga dy ekipe mjekësh mbrëmjen e 15 majit. Fico luftoi për jetën si pasojë e plagëve të rënda nga të shtënat. “Gjatë natës, mjekët ia dolën ta stabilizojnë gjendjen e pacientit”, tha zëvendëskryeministri Robert Kalinak për gazetarët që ishin mbledhur pranë spitalit ku po mjekohet Fico. “Fatkeqësisht, gjendja e tij është ende serioze, sepse plagët janë të komplikuara”, tha Kalinak, i cili është edhe ministër i Mbrojtjes dhe aleat i ngushtë i Ficos në partinë e tij. Sipas tij, sulmuesi ishte i “motivuar politikisht”. Presidentja sllovake, Zuzana Caputova, bëri thirrje të enjten që të ndalet "urrejtja e dhunshme" që e ka kapluar Sllovakinë. "Ne duhet të dalim nga ky cikël i urrejtjes së dhunshme dhe nga akuzat e ndërsjella. Ajo që ndodhi dje, ishte akt individual, por atmosfera e tensionuar e urrejtjes është vepër e jona e përbashkët", tha ajo. Pamjet: AFP