Si pasojë e sulmeve me molotov dhe sende të forta në protestën e opozitës, 11 punonjës të Policisë së Shtetit kanë mbetur të dëmtuar dhe po marrin ndihmë mjekësore. Pas dokumentimit ligjor të akteve të dhunës policia bën me dije se ka shoqëruar drejt ambienteve të Policisë 23 protestues. Por Sali Berisha thotë se janë më shumë dhe kërkon lirimin e tyre të menjëhershëm. Demokratët thonë se ndaj protestuesve është ushtruar dhunë brutale përfshirë edhe një fëmijë 10-vjeçar, ndërsa policia pranoi se e kishte shoqëruar e më pas lënë të lirë të miturin kur iu verifikua mosha Lirimin e protestuesve e kërkuan në orët e vona të së shtunës edhe deputetë të Partisë Demokratike dhe mbështetës të tyre që u përplasën efektivët e komisariatit numër 1. Demokratët u futën edhe në ambientet e brendshme të komisariatit ku pati edhe përplasje fizike Ndërkohë policiët e dëmtuar janë vizituar në Spitalin e Traumës dhe në repartin e djegies nga Drejtori Vendor i Policisë së Tiranës, Elton Alushi, dhe Zëvendës/Drejtori për Rendin, Dashnor Muhaj, ndonëse Partia Demokratike në një njoftim të sajin tha se nuk ka efektivë të lënduar por ka dhjetëra protestues.