Panamaja këmbëngul se sovraniteti i saj mbi kanal është i “panegociueshëm” pasi presidenti i zgjedhur i Shteteve të Bashkuara të Amerikës, Donald Trump, la të hapur opsionin e përdorimit të Ushtrisë për ta marrë kontrollin e kanalit. Trumpi e bëri deklaratën gjatë një konference për media të martën ku po ashtu deklaroi se Kanali i Panamasë menaxhohej nga ushtarë kinezë. Ministri i Punëve të Jashtme i Panamasë, Javier Martínez-Acha, u përgjigj duke thënë se “duart e vetme që janë duke menaxhuar kanalin, janë të popullit të Panamasë dhe do të vazhdojë të qëndrojë ashtu. Asnjë lloj oferte nuk është bërë dhe se sovraniteti i kanalit tonë nuk është i negociueshëm dhe se është pjesë e historisë së vuajtjes dhe një çështje e pakthyeshme”, deklaroi ai. Kanali i Panamasë ishte menaxhuar nga SHBA-ja për dekada, por në traktatin e nënshkruar nga presidenti amerikan, Jimmy Carter në vitin 1977 iu dorëzua Panamasë më 31 dhjetor të 1999-s. Ndërkaq, Antony Blinken, sekretari në largim i Shteteve të Bashkuara të Amerikës, tha se ideja e Donald Trumpit për marrjen nën kontroll të Groenlandës – ndoshta edhe me forca ushtarake “nuk është e mirë”. “Ideja e dhënë për Groenlandën është dukshëm jo e mirë, por më e rëndësishmja është se nuk do të ndodhë, prandaj ne nuk duhet të kalojmë shumë kohë duke folur për të. Ne jemi më të fortë, më efektivë dhe marrim rezultate më të mira kur punojmë afër me aleatët tanë, dhe jo duke bërë veprime që i largojnë ata”, tha Blinken gjatë një konference për shtyp në Paris.