Kompania e pasurive të paluajtshme e Donald Trump është gjobitur me 1.6 milion dollarë (1.31 milion £) nga një gjykatës i Nju Jorkut për krime tatimore. Juristët e kishin shpallur Organizatën Trump fajtore për mashtrim dhe falsifikimin e të dhënave të biznesit në muajin dhjetor të vitit 2022. As ish-presidenti dhe as pjesëtarë të tjerë të familjes së tij nuk ishin pjesë e gjyqit që u zhvillua, ndërsa i vetmi person i akuzuar ishte ish-shefi financiar i kompanisë, Allen Weisselberg. Trump ende përballet me probleme ligjore, duke përfshirë një padi të veçantë në Nju Jork kundër tij dhe fëmijëve, mbi akuzat për mashtrim. Dy degë të Organizatës Trump u shpallën fajtore për pasurimin e drejtuesve të saj kryesorë me përfitime të pataksuara, si makina luksoze dhe tarifa të shkollave private, për 15 vite. Ky është dënimi i parë penal i një prej kompanive të ish-presidentit të Shteteve të Bashkuara të Amerikës. Weisselberg, shefi financiar për një kohë të gjatë i kompanisë së Trump, u dënua me pesë muaj burg për rolin e tij në skemën e mashtrimit fiskal. Më parë ish-presidenti premtoi se do të kërkonte pafajësinë, ndërsa gjyqin e konsideroi të motivuar nga politika