Rusia lëshoi gjatë natës 188 dronë kundër 17 rajoneve të Ukrainës. Zyrtarët e forcave ajrore ukrainase deklaruan se ky zhvillim shënoi një rekord për nga numri i dronëve të përdorur në një sulm të vetëm. Shumica e dronëve u interceptuan, por të tjerë dëmtuan ndërtesa banimi dhe infrastrukturë thelbësore, si rrjetin kombëtar të energjisë elektrike. Alarmet për sulme ajrore gjatë natës në rajonin e Kievit zgjatën më shumë se shtatë orë. Rusia po përpiqet të dobësojë vullnetin e banorëve civilë për të rezistuar pas rreth 3 vitesh luftë. Ministria ruse e Mbrojtjes tha të martën se forcat e saj shkatërruan 39 dronë ukrainas gjatë natës mbi rajonet ruse pranë kufirit me Ukrainën. Që nga mesi i këtij viti Rusia ka goditur zonat civile të Ukrainës me sulme gjithnjë e më të rënda me dronë, raketa e bomba. Moska ka ruajtur kryesisht epërsinë në fushën e betejës dhe ka shënuar përparime të rëndësishme taktike në rajonin lindor të Donetskut, sipas analistëve ushtarakë perëndimorë. Megjithatë sipas grupit të ekspertëve mbrojtja e Ukrainës në këtë rajon nuk rrezikon të thyhet. Ata vunë në dukje se Rusisë do t’i duhej të kapte më shumë se 8,000 kilometra katrorë territor, për të arritur qëllimin e Kremlinit për të kapur të gjithë Donetskun. Ukraina përballet me një dimër të vështirë, me pasiguri mbi furnizimin me energji elektrike mes sulmeve ruse në vazhdim e mbi mbështetjen amerikane pasi Presidenti i zgjedhur Donald Trump të marrë detyrën në janar.