Gati 250 vite burg është dënimi që një gjykatë në Turqi i dha 37 personave të akuzuar për spiunazh në favor të shërbimit inteligjent izraelit Mossad. Lajmin e përcjell media “The National”, sipas të cilës Ahmet Koray Ozgurun dhe Alperen Erkut u dënuan me nga tetë vjet e një muaj për “marrje informacioni të ndaluar me qëllim spiunazhi”, sipas një liste akuzash nga Gjykata e Lartë Penale e Stambollit. Ata kanë të drejtë ankimimi dhe koha e kaluar në paraburgim do t’u hiqet nga dënimi. Autoritetet turke arrestuan muajin e kaluar shtetasin Kosovar, Liridon Rexhepi, të përshkruar si financues të Mossadit në vend. Raportohet se ai hyri në Turqi më 25 gusht dhe u prangos pesë ditë më vonë në Stamboll nga një njësi kundër terrorizmit, pas gjurmimit nga shërbimi sekret turk turke MIT. E njëjta media pohon se ka konfirmuar me burime nga autoritetet e sigurisë se Rexhepi ishte akuzuar për “spiunazh kundër shtetit”, pasi autoritetet arritën në përfundimin se ai u transferonte para agjentëve në terren të Mossad në Turqi, të cilët po operonin me drone, duke kryer operacione kundër politikanëve palestinezë teksa grumbullonin të dhëna për Izraelin rreth Sirisë. Sipas The National, Rexhepi e ka pranuar në një deklaratë në polici se kishte bërë “transferta parash”. Për dënimin e të akuzuarve raporton edhe gazeta turke “Cumhuriyet”, e cila nuk e përmend megjithatë emrin e Liridon Rexhepit.