NATO-ja nisi stërvitjen gjigande ushtarake në Shqipëri, me pjesëmarrjen e mijëra forcave nga Shtetet e Bashkuara. Stërvitje e kësaj shkalle është e parat në Ballkanin Perëndimor që nga Lufta e Dytë Botërore, tha koloneli amerikan, Joseph Scrocca i cituar nga REL. Koloneli theksoi se Shqipëria është “një aleate e vendosur e NATO-s që nga viti 2009” dhe “një partnere e vlerësuar e sigurisë - si në rajon, ashtu edhe në nivel global”. Trupat amerikane zbarkuan në vendin tonë në 26 prill dhe deri nëë 10 qershor, do të zhvillojnë stërvitje në gjashtë baza tokësore, detare dhe ajrore. “Ky mision historik demonstron aftësinë tonë për të shërbyer si një partner strategjik i sigurisë në Ballkanin Perëndimor dhe në rajonet e Detit të Zi”, pohoi Scrocca.Stërvitjet e koduara si “DEFENDER-Europe 21” janë manovra të përvitëshme shumëkombëshe, të cilat udhëhiqen nga SHBA-ja. Natyra e tyre është mbrojtëse dhe përqendrohet në parandalimin e agresionit. Në kuadër të këtyre stërvitjeve rreth 28,000 forca të SHBA-së dhe 26 vendeve të tjera do të kryejnë operacione gati të njëkohshme në më shumë se 30 zona trajnimi, nisur nga Baltiku dhe Afrika deri në rajonet e Detit të Zi dhe Ballkanit.