Pasi i tregoi Kinës dhëmbët me tarifat tregtare gjunjëzuese, Donald Trump i uli tonet me homologun kinez, Xi Jinping. Sipas një njoftimi të Presidentit amerikan, zyrtarë të lartë nga SHBA-ja dhe Kina do të takohen sot në Londër për të zhvilluar bisedime të mëtejshme tregtare, në vazhdën e telefonatës së mëhershme që theu akujt mes dy liderëve. Delegacioni amerikan do të udhëhiqet nga ministri i Financave, Scott Bessent, ministri i Tregtisë Howard Lutnick dhe i ngarkuari për Tregtinë Jamieson Greer, sic sqaroi Trump në platformën e tij Truth Social. Shefi i Shtëpisë së Bardhë u shpreh me optimizëm se: "takimi pritet të shkojë shumë mirë". Trump ra dakord për raundin e ri të bisedimeve në një telefonatë që zhvilloi të enjten me Xi Jinping. Sipas Presidentit amerikan, bisedimet kanë për qëllim të diskutojnë detajet e njëmarrëveshjeje tregtare të arritur në maj midis dy ekonomive më të mëdha të botës. Pas telefonatës, Pekini u shpreh shumë më i rezervuar dhe i kërkoi SHBA-së t'u përmbahet kushteve dhe rregullave të ndërsjella të përfshira në marrëveshje, teksa insistoi se pala kineze e ka zbatuar marrëveshjen me seriozitet dhe ndërgjegje. Që nga marrja e postit, Trumpi nisi një kurs të ashpër në politikën tregtare ndaj Kinës, duke i rritur tarifat doganore ndëshkuese ndaj importeve kineze në SHBA deri në shifrën marramendëse prej 145 përqindësh, të cilave Pekini iu përgjigj me kundër-tarifa. Në mesin e muajit maj të dyja palët ranë dakord në një takim në Zvicër që të ndalonin spiralen e përshkallëzimit dhe ranë dakord, të paktën përkohësisht, për një ulje të ndërsjellë të tarifave.