Ministrat e Jashtëm të Bashkimit Europian u mblodhën në Kiev për herë të parë në një takim jashtë bllokut, për të shprehur mbështetjen për Ukrainën, më shumë se 19 muaj pas fillimit të pushtimit rus. Në bisedimet e përshkruara nga pjesëmarrësit si “historike”, nuk u dhanë premtime të menjëhershme për ndihmë për Ukrainën. “Takimi duhet të kuptohet si një angazhim i qartë i Bashkimit Evropian ndaj Ukrainës dhe mbështetja e tij e vazhdueshme në të gjitha dimensionet”, tha kryediplomati i BE-së, Josep Borrell. “Gjithashtu dërgon një sinjal të fortë në Rusi se ne nuk jemi të frikësuar nga raketat apo dronët tuaj”, shtoi ai. Presidenti Volodymyr Zelensky deklaroi para ministrave të jashtëm të Bashkimit Evropian në Kiev se kohëzgjatja e luftës në Ukrainë do të varet nga mbështetja që ajo merr nga aleatët. “Fitorja jonë varet drejtpërdrejt nga bashkëpunimi ynë: sa më shumë hapa të fortë dhe parimorë të ndërmarrim së bashku, aq më shpejt do të përfundojë kjo luftë”, tha Zelensky. Pavarësisht se nuk caktuan një fond të ri, ministrat e BE-se u shprehën në favor të mbështetjes së vazhdueshme për Ukrainën dhe dëshirës së vendit për t’u bërë një shtet anëtar i bllokut në planin afatgjatë. Ukraina ka qenë kandidate për anëtarësim në BE që nga qershori 2022. 27 anëtarët e BE-së duhet të marrin ende një vendim unanim nëse do të hapin negociatat. Megjithatë, bisedimet e pranimit mund të zgjasin disa vjet dhe nuk janë garanci për pranim. Borrell shpreson që vendet anëtare të BE-së të vendosin deri në fund të vitit për mobilizimin e 5 miliardë eurove për vitin 2024 si ndihmë ushtarake. Pamjet: AFP