Katastrofat natyrore nuk ndalohen dot, por mbështetjen e solidaritetin nuk ka gjë që i ndal. E pikërisht në këto momente të vështira, Turqisë i duhet e gjithë mbështetja që mund të marrë. “Ne nuk do t`i harrojmë kurrë miqtë që na u gjenden pranë në këtë ditë të errët, dhe do t`i kemi në lutjet tona”, deklaroi presidenti turk Rexhep Tajip Erdogan. Por as Shqipëria nuk harroi solidarizimin e menjëhershëm të Turqisë pas ditëve të tmerrit të 26 nëntorit 2019, më i madhi që vendi ynë kishte përjetuar për dekada dhe ndihmat qe vërshuan prej saj për procesin e rindërtimit pas tërmetit të atëhershëm. Një nder kthehet tani njëfarësoj në formën e një ndihme prej 1 milionë eurosh të dhuruara nga vendi ynë për të prekurit nga katastrofa e dy tërmeteve më shkatërrimtare të shekullit në Turqi: Tragjedia i afron edhe më shumë dy popujt tanë. Kryeministri Edi Rama telefonoi live gjatë fushatës “Turqia një zemër” , të transmetuara njëherazi në disa kanale televizive turke për të shprehur ngushëllimet e tij për jetët e humbura, e për të kujtuar gjithashtu ato cfarë Turqia dhe Erdogani bëri për shqiptarët në 2019-tën.