Gjykata e Elbasanit e cilësoi të paligjshëm arrestimin e 16 personave në kuadër të operacionit Metalurgjiku ne Elbasan. Pavarësisht kërkesës së Prokurorisë, pas një seance maratonë prej më shumë se 7 ore, gjykata vendosi masë sigurie “Detyrim paraqitje” për secilin prej tyre. Operacioni policor Metalurgjiku u zhvillua mbrëmjen e 12 dhjetorit pas sinjalizimeve nga banorë të zonës se në dy kompani digjeshin mbetje në qiell të hapur, tym i cili mbuloi edhe qytetin. Si rezultat i ndërhyrjes policore, u arrestuan 16 persona administratorë, drejtorë prodhimi, inxhinierë, drejtues teknikë, përgjegjës turni, operatorë furrash, punonjës e zyrtarë vendorë të mjedisit dhe u shpallën në kërkim 8 të tjerë. Pas këtij vendimi Gjykate Prokuroria është shprehur e vendosur ta ankimojë vendimin e të vijojë hetimet për katastrofën mjedisore në Elbasan. Në lidhje me ndotjen në zonën e Metalurgjikut Top Channel ju drejtua edhe Agjencisë Rajonale të Mjedisit si institucioni i drejtpërdrejtë përgjegjës për situatën, por hasi në heshtje zyrtare. E njëjta situatë si zjarri që përfshiu landfillim e Elbasanit për 6 ditë me radhë në muajin korrik dhe nga institucionet e mjedisit nuk pati asnjë reagim zyrtar. Burime bëjnë me dije se në kompanitë CCALV SHPK dhe GSA Ferrokrom shpk ka mbetje të ngurta të depozituara prej shumë vitesh të cilat paraqesin rrezikshmëri të lartë mjedisore. Pak kohë më parë, duke ju referuar Planit Kombëtar për Menaxhimin e Integruar të Mbetjeve 2020-2035, Top Channel trajtoi problematikën që zonat industriale në Shqipëri vazhdojnë prej dekadash të tëra të mbajmë të depozituara kimikate të rrezikshme dhe metale të rënda. Sipas dokumenteve zyrtare të Agjencisë Kombëtare të Mjedisit këto “pika të nxehta” përbëjnë rrezik serioz si për mjedisin, ashtu edhe për shëndetin e banorëve.