Friedrich Merz është zyrtarisht Kancelari i ri i Gjermanisë. Ai u zgjodh nga Bundestagu gjerman në raundin e dytë, të mbajtur këtë të martë, me 325 vota, pas dështimit të paprecedentë në raundin e parë, që shkaktoi pakënaqësi të thellë brenda koalicionit të tij. "Ju falenderoj për besimin dhe e pranoj zgjedhjen", ishte mesazhi i parë i Merz pas votimit në Bundestag. Merz, i cili fitoi zgjedhjet në shkurt dhe krijoi një koalicion qeverisës muajin e kaluar, nuk u konfirmua në raundin e parë, pasi mori vetëm 310 vota, nga 316 që i duheshin, një pengesë tronditëse që shënoi një kthesë tjetër në një periudhë të vështirë pasigurie për vendin. Kjo ishte e re në historinë e Republikës Federale të Gjermanisë. Asnjëherë më parë, pas zgjedhjeve të Bundestagut dhe negociatave të suksesshme të koalicionit, nuk ka dështuar në Bundestag një kandidat për kancelar. Zgjedhja e tij në raundin e dytë do të thotë që Merz ta fillojë mandatin si Kancelar në një bazë të paqëndrueshme: Votat e së martës zbuluan ngurrim brenda koalicionit të tij dhe i dhanë partisë kryengritëse të ekstremit të djathtë AfD një mundësi të re për të trazuar Bundestagun. Seanca e votimit e të martës u ndoq në sallë nga një numër i madh të interesuarish, mes të cilëve edhe ish-kancelarja Angela Merkel. Zgjedhja e politikanit konservator 69-vjeçar si Kancelar është një histori rikthimi, pasi karriera e tij politike dukej se kishte marrë fund në vitet 2000. Arsyeja për këtë ishte pikërisht Angela Merkel, dikur bashkëpunëtorja kryesore e tij në partinë demokristiane. Ai u rikthye në politikë vetëm pasi Merkel dha dorëheqjen si udhëheqëse e partisë CDU më 2018. Si politikan, Merz gjithmonë ka mbrojtur vlerat konservatore dhe ka theksuar rëndësinë e familjes. Gjatë kohës kur nuk u mor me politikë, Merz punoi si avokat dhe biznesmen, duke udhëtuar shpesh në Shtetet e Bashkuara dhe Kinë. Ai u njoh me bashkëshorten e tij, Charlotte, e cila tani është gjykatëse, ndërkohë që studionte për drejtësinë. Çifti ka tre fëmijë të rritur. Një fakt interesant për kancelarin e ri të Gjermanisë është se ai ka licencë piloti dhe ndonjëherë e drejton vetë avionin e tij të vogël nga shtëpia në Gjermaninë perëndimore drejt Berlinit.