Faruk Ozer, 29 vjeçari turk, i akuzuar se ka mashtruar qindra mijëra qytetarë përmes një platforme online për këmbimin e kriptomonedhave, u ekstradua nga Shqipëria drejt Turqisë. Interpol Ankaraja e mori turkun në dorëzim nga autoritetet shqiptare, në aeroportin ndërkombëtar të Tiranës, për të fluturuar drejt Stambollit me një nga avionët e kompanisë Air Albania. Ish-bosi i kriptomonedhave themeloi në vitin 2017, të parën kriptomonedhë turke Thodex, duke tërhequr mbi 390 mijë persona që investuan aty një shumë që autoritetet turke e përllogarisin në afro 2 miliardë dollarë. Në prill të vitit 2021, ai u largua nga Turqia, drejt Shqipërisë, ndërsa investitorët u njoftuan më pas për pezullimin e aktivitetit. Pas denoncimit të menjëhershëm, autoritetet turke nisën hetimet, duke arrestuar disa dhjetra bashkëpunëtorë të të riut turk, ndërsa Ozer, u arrestua verën verën e vitit të kaluar në Himarë, në një nga zonat më të frekuentuara bregdetare.