Futbollistja spanjolle, Jenni Hermoso ka thënë në gjykatë se “një nga momentet më të lumtura” të jetës së saj u shkatërrua kur presidenti i atëhershëm i Federatës Spanjolle të Futbollit, Luis Rubiales, e kapi atë dhe e puthi në buzë pas fitores së Spanjës në Kupën e Botës në gusht 2023. 47-vjeçari, akuzohet për sulme seksuale si dhe për presion të ushtruar ndaj Hermosos që të deklaronte se puthja, që u bë pak pasi ekipi i femrave të Spanjës triumfoi në Sydney, ishte konsensuale. Ai ka pohuar se ka kërkuar lejen e saj për puthjen. Nëse shpallet fajtor, Rubiales, i cili dha dorëheqjen si president i federatës një muaj pas incidentit, mund të përballet me dy vite e gjysmë burg: një vit për sulm seksual për puthjen e detyruar dhe 18 muaj se detyroi Hermoson për të minimizuar atë që ndodhi. Duke dhënë dëshminë e saj në ditën e parë të gjyqit, Hermoso tha se kurrë nuk kishte pranuar të puthej nga Rubiales. “U ndjeva e pa respektuar. Një nga ditët më të lumtura të jetës sime u njollos dhe mendoj se është shumë e rëndësishme për mua të them se nuk e kam kërkuar kurrë, aq më pak s’e prisja që kjo të ndodhte. Unë personalisht mendoj se ishte mungesë respekti”, tha futbollistja. Hermoso, e cila luan për Tigres në Meksikë, tha se asaj i ishte treguar një deklaratë që ishte hartuar në emër të saj nga federata dhe e cila ishte lëshuar në emër të saj po atë ditë.