Marrëveshja e mineraleve të rralla, varet nga presidenti amerikan Donald Trump, u shpreh presidenti ukrainas, Volodymyr Zelensky. Sipas tij, nuk është rënë dakord asnjë garanci sigurie, që sipas tij do të ishte thelbësore. “Nëse nuk marrim garanci sigurie, nuk do të kemi armëpushim, asgjë nuk do të funksionojë, asgjë”, tha Zelensky për BBC. I pyetur nga gazetarët, ai nuk konfirmoi ende udhëtimin e planifikuar në Uashington të premten për të finalizuar marrëveshjen, duke shtuar se ekipet po punojnë për të. Detajet mbi marrëveshjen për mineralet janë ende të paqarta, por duket se është “shumë e favorshme” për Uashingtonin, tha më herët një gazetare e Shtëpisë së Bardhë për BBC Radio 5 Live. “Në thelb, ajo që po shohim është një angazhim financiar afatgjatë, një marrëveshje, një partneritet mes SHBA-së dhe Ukrainës, në këmbim të kontributit të Ukrainës me rreth 50% të të ardhurave të saj nga mineralet, nafta dhe gazi, infrastruktura dhe portet në një fond investimesh që menaxhohet bashkërisht nga SHBA-ja, por me SHBA-në që ka 100% të interesit në të”, shtoi ajo.