Nga Washingtoni, kryeministri në largim i Malit të Zi, Dritan Abazoviç konfirmoi se është arritur marrëveshja në parim për krijimin e qeverisë së re dhe që presidentit t`i dërgohet emri i Miodrag Lekicit, i partisë Demos si kryeministër i ardhshëm. “Kemi arritur në një marrëveshje le ta quajmë të deklaruar që kemi shumicën për qeverinë e re”, tha Abazovic, pa dhënë më shumë sqarime. Emri i kandidatit për shef te ekzekutivit u dwrgua pasi dita e sotme paraqeste afatin e fundit për ta bërë dicka të tillë. Megjithatë, asgjë nuk është ende përfundimtare. Partia Ura, nga sa pohoi Abazovic, e mbështeti dhënien e mandatit për Lekiç, por nuk e nënshkroi sepse kërkon të gjithë marrëveshjen dhe më pas të nënshkruajë. Shumica parlamentare e dalë nga zgjedhjet e vitit 2020 pohoi gjithashtu se është arritur marrëveshja për të mandatuarin e ri të qeverisë së Malit të Zi. Sipas përfaqësuesit të koalicionit të Frontit Demokratik, Andrija Mandic, partitë fituese të zgjedhjeve të vitit 2020 janë pajtuar me propozimin që Lekic të ngarkohet me formimin e qeverisë së re. Mandic po kështu nënvizoi se qeveria e ardhshme do të krijohet në bazë të barazisë, sipas së cilës gjysma e anëtarëve të saj do të jenë nga radhët e URA, gjysma tjetër do të jenë ministra nga partitë e tjera dhe kandidati për mandat, Miodrag Lekic, do të ketë një “votë të artë”. Shtetet e Bashkuara janë shprehur se nuk e shohin Frontin Demokratik si partner sepse ai nuk mbështet vlerat evropiane. Kjo parti u përmend gjithashtu në raprotin e fundit të SHBA-së për financimin nga Rusia të partive politike të huaja. Abazovic i pyetur për shqetësimet perëndimore rreth forcave pro-ruse, siguroi Uashingtonin se nuk ekziston asnjë mundësi për të bere dicka të gabuar në politikën e jashtme, por fakti mbetet nga ana tjetër që Fronti Demokratik është i përfshirë në bisedimet për qeverinë e ardhshme. Pamjet: AFP