Krijimi i qeverisë së re në Malin e Zi tashmë është shumë pranë. I mandatuari me formimin e saj, Dritan Abazovic, udhëheqësi i Lëvizjes Qytetare URA, njoftoi se është rënë dakord për përbërjen e ekzekutivit të ri. Qeveria e mëparshme, e drejtuar nga kryeministri Zradvko Krivokapic, u rrezua me mocion mosbesimi në 4 shkurt. Abazovic sqaroi se e ka njoftuar Kuvendin e Malit të Zi për marrëveshjen e arritur për zgjedhjen e Qeverisë së re. Kabineti i tij, sic tha, do të ketë mbështetjen e 46 deputetëve nga 81 që ka gjithsej Kuvendi i Malit të Zi. “Ideja është ta zhbllokojmë Malin e Zi, që shteti të ketë institucione funksionale dhe stabilitet. Në vend që të grindemi, të kemi pajtim dhe të përpiqemi të ndërtojmë një perspektivë europiane. Ne nuk jemi kundër zgjedhjeve, por jemi kundër zgjedhjeve pa institucione”, ishte komenti i tij. Abazovic nuk dha më shumë detaje mbi përbërjen e kabinetit, por tha se nëse merr mbështetje në Kuvend, ai do të ketë 20 ministra dhe katër nënkryetarë. Seanca e parlamentit malazez ku do të zgjihet qeveria e re, me shumë gjasë, do të zhvillohet javën që vjen. Qeveria e re pritet të përbëhet nga Lëvizja Qytetare URA e Abazovicit, Partia Popullore Socialiste, e cila është pro-serbe, Partia Socialdemokrate dhe partitë kombëtare të shqiptarëve dhe boshnjakëve, ndërsa do të ketë mbështetje parlamentare edhe nga Partia Demokratike e Socialistëve e presidentit malazez, Millo Gjukanovic, që thotë se do ta përkrahë “pa asnjë interes apo pjesëmarrje në të”. Pamjet: AFP